(Lesezeit: ca. 2:00 Minuten für an Bayern)
Juli-Wanderung durch's Kinschdarfa Moor
Element Luft
Wichtigs
- Familienfreindliche Entdeckungs-Ausflug ins Moor, ca. 4 km, ca. 1 Std.
- Parkmeglichkeitn entlang da Hauptstrass in Kinschdarf
- Obacht: Im Moor gibt’s ned umarasonst an Fuaßweg – eiso bleibt´s zum Schutz vo Pflanzn und Viecha aufm Weg
S' Panorama vo Kinschdarf misamd da hervorstechendn Pfarrkirch St. Laurentius is ned nur wunderschee, da Ort is a gschichtsträchtig. A easte urkundliche Eawähnung stammt bereits aus'm Johr 778. Fast dausend Johr schbada, am 16. Dezember 1705, hom si do im Wirtshaus Post je drei Wirt vo Minga und Bod Däiz troffa, um de Befreiung Mingas gega de kaiserlichn Bsatzer aus Östareich z' plana. Eana Schlachtplan is olladings fehlgschlogn, jene Nochd vom 25. Dezember 1705 is ois „Sendlinger Mordweihnochd“ in d'Gschicht eiganga. Bei dem Gmetzel hom etwa 1.100 aufständische Baur‘n ihr Lebm glossn, d'Östarreicher hom grod 40 Gfoiene zum Beklogn ghabt. Ganz so oid wia Kinschdarf is da dazuaghörige Seglflughafen natürle ned. Des sognannte Seglflugzentrum is im Friahjoahr 1960 gründ' worn und is mittlerweile laut eignem Bekundn oana da bekanntesten und sportlich erfoigreichstn Seglflugplätz wäidweid. S' Zentrum beherbergt dauahoft secks Seglflugvereine mit insgsamt rund 70 Seglflugzeiga und acht Motorseglan. Wos de geografische Lag vom Flugblotz bsonders reizvoi macht, is de Näh zu de boarischn Oipm. Houch om in da Luft zoagt si den schneidigen Burschn in eana fliangadn Kistn a traumhafts Bergpanorama. Wenn's Element Luft oda vuimehr d'Thermik bsondas guad moant mid de Pilotn, san bis zu 4.000 Hechnmeta drin. Ganz frei noch'm Motto: „The Sky is the Limit!“
FotoclubWOR.jpg "Element Luft: Königsdorfer Flugplatz")
Erkundung vom Kinschdarfa Moor
Unsa kloana Ausflug ins Kinschdarfa Moor gäd an da Kirch St. Laurentius im Ortszentrum vo Kinschdarf o. Vo do aus gänga mia d' Mooseuracher Strass ca. 700 Meta in südlicha Richtung. Noch de letztn Heisa biang ma rechts in an Feijdweg nei, der uns direkt ins Moor und zum Zeijwiesa Muihboch fiahrt. Mia überquern de kloana Bruggn und stenga mittn in am Fleckal unberührta Natur. Do wachsn Planzn wia Sonnatau, Rosmarinheid, Glocknheid sowia Blemebinsn und mid a bissl Glück kinna mia a Vegl wia z.B. Braunkehlchen, Schwarzkehlchen, Woidschnepfm und Bekassinen, zoireiche Insektn oda a Schmetterling sowia Kreizottan beobachtn. Mia foing am Schottaweg weida in nördlicha Richtung bis zur Stootsstrass St2064, hoitn uns do rechts, genga a kurz Stückl an da Stootsstrass weida, bis ma kurz vor da Ortsschaft rechts in d‘ Beierberger Strass eibiang, de uns zum Ortskern zruck bringt. Zwischn am Seglflugblotz nördle vo Kinschdarf und da Stootsstrass St2064 breit si außerdem mid 250 Hektar s' Kinschdarfa Woadfuiz, a renaturierts Hoachmoor aus, des zur Däiza Moorachsn und domid zu de insgsamt 11 Prozent da Moorflächn im Landkreis zäid.
De bayrischn Moore speichan secks Moi so vui Koihnstoff wia Bayerns Wäida und hom domid a enorme Bedeitung für'n Klimaschutz.
Wandarutn
Bittschen aufbassn: Wegen de aktuellen Corona-Schutzmaßnahmen konns zu Einschränkunga kema. Schauns bitte vorher no de lokalen Regelungen o!
Disclaimer
Die Verwendeten Bilder und Texte (in hochdeutsch) zu dieser Wanderung wurden uns freundlicherweiße vom Fotoclub Wolfratshausen zur Verfügung gestellt.
Foto: © Sandra Ilmberger / Text: © Andy Ilmberger, Sandra Ilmberger
Für die Richtigkeit der Angaben und für Schäden jeglicher Art im Zusammenhang mit den aufgeführten Wandervorschlägen übernehmen wir keine Haftung. Dies gilt insbesondere für den Zustand der zu benutzenden Wege. Die Benutzung der Straßen und Wege erfolgt ausschließlich in Eigenverantwortung. Bei den Zeit- und Streckenanageben handelt es sich um Richtwerte. Bitte besorgen Sie sich vor Beginn einer Tour das entsprechende Kartenmaterial und ggf. die passende Ausrüstung!