Oktober Radltour zum Kirchsä

Da Wäidraum, unendliche Weitn. Mia schreibm s'Johr 2022. Des is de Gschicht da Muichstrass und ihrane Abenteier übern Kirchsä und ganz woanders. Um de Muichstrass am Kirchseä in ihrana gänzlichn Schönheit aba überhaupts gebührend würdign z'kinna, klärn ma kurz auf, wo de Muichstrass eigentle is.

Dass unsre Erdn ko Scheibm net is, hod si mittlerweile bis an letztn Winkl vom Vatikan rum gschbrocha. Unsre Galaxie hingegn – eiso ebm jene Muichstrass – is sehr woi a Art vo Scheibm. Gnauer gsogt schaut's aus wia a Zimtschneck, a spiralförmiga Fladn. D'Muichstrass entstand vo rund 14 Milliardn Johr mid am Urknall und is seitdem vo da Gress vom Stecknodlkopf zu na riesign Galaxie her gwachsn. Dad ma's heid mid Lichtgschwindigkeit vo oam End zum andan durchquern, dad ma 120.000 Johr braucha.

Und doch is d'Muichstrass verglicha mid andan Galaxien nur so mittelgrouß. In den unendlichn Weidn des Wäidraums wird de Anzoi der vorhandn Galaxien auf rund na Billion gschätzt! Und wer glabt do jetz no, dass mia Menschn alloa im Oi san?

Guad möglich, dass ma ned amoi de oanzign Bewohner unsrer Galaxie san. In de Spiraln da Muichstrass tummln si mehrare hundert Milliona vo Stern. Jeder Stern is dabei a feirig glühade Sonn mit ihram eiganem Planetn, Mondn und Asteroidn. A Stern is eiso a immer a eignes Sonnasystem – so wia unsas. Unsa Sonnasystem liegt dabei eher aussn auf da Spirale da Zimtschneckn. Und obwoi de Sonn über´s Hundertfache gressa is ois unsre Erdn, wirkt si im Nebeband da Muichstrass kaum mehr ois a leichdends Staubkerndl. Mid bloßm Aug uns unsra Kamera in da Nocht seng ma vo da Muichstrass ned mehra ois a Bruchstückl da Spirale. Und dennoch is ihra Schönheit so unermessle.

Den Begriff „Muichstrass“ verdanga mia übrigens den antiken Griechn, de si übers herrliche Firmament a scho an Kopf zerbrocha hom. Si hom glabt, dass de Muichstrass durch de Göttig Hera entstandn is, ois de beim Stillen des Zeus-Sohnes Herakles ihra Muich übern ganzn Himme verspritzt hod. Deswegn a der Name Galaxis, des griechische Wort für Muich.

Heid woaß ma, dass der muichige Gürtl entlang an Himme unzählige leichtende Stern san.