Dezember-Wanderung in D'Zej

D'Zej zejd zu de scheenst'n Regiona z'Oberbayern. Doher wundert's oan ned, dass si do bisweiln a s'deitsche Fuim- und Fearnsä-Gschäfft seng hod lossn, wenn's drum gäd, traumhafte Hindagründ für d'Kinofuim und Fearnsäserien ei zum fanga. So städ a des berühmte "Forsthaus Falkenau" aus da gleichnomig'n Fearnsäserie am Woidweiha ums Eck. Und im Nachborort Obermuihtoi find si "s'Rosenbräu" aus da Feansähserie "Die Rosenheimcops". De wundascheene Umgebung vo D'Zej is aba ned nur a Schaublotz für d'Första und d'Polizistn, sondern is a im Kinofuim "Ballon" vom Michael "Bully" Herbig zum seng.
Unsre Rundwanderung gähd ins malerische Umland vo D'Zej zu de gnannt'n Drehort, vorbei an da Woifahrtskirch Maria Elend, de emfois in a poor Ausschnied vom Forsthaus Falkenau zum seng is, bis hi zur beschaulichn Kreizbiche-Kiach mid Fernblick auf d'Oipm.

Mia start'n an Rundweg am Klosta D'Zej. Vo do aus geht a ausgschuidlda Weg duach'n Woid am Nordufa vom Woidweiha. Do am Nordufa stähd a des berühmte Forsthaus (Aufpassn: Privat, ned nei geh!) Am Ufa hoit ma uns lings und foing am Weg um an Weiha rum. An da Wegzweigung genga mia südle am Woidfriedhof "Waldruh" (seit 2020) vorbei zum Südufa nüba. Vo do aus gähds ollawei grod aus, an na Wiesn vorbei, auf dera a Ausschnied für'n Kinofuim "Ballon" entstandn san, bis hi zur Woifahrtskiach Maria Elend. An da Kiach hoit'n mia uns lings, vorbei am Austrogshof und foing bergauf an Weg an Woid nei. Noch 300 Meta biang ma rechts ob (Schuidl auf Bad Däiz). Nomoi 800 Meter weida genga mia no amoi rechts, vorbei am kloana Weiha Richtung Norden bis ma auf Obermuihtoi kemma und do na über d'Däiza Straß bis zur Kreizung Bairawiesa Straß. Da Aufstieg zum Kreizbiche geht am Hauseck vo da Kreizung o. Vo da Kreizbiche-Kiach glangt ma über'n Feijdweg in östlicher Richtung wieda zruck zum Klosta.