November-Wanderung um da Deininger Weiha

Da Gleissntoiweiha, den ma eher untam Nama Deininga Weiha kennt, is a kloana Moorsä in da Gmoa Straßlach-Dingharting, inmitt´n am idyllischen Naturschutzgebiet. Ois Badesä scho lang koa Geheimtipp nimma, trifft ma do aba a an hoaße Sommadog ned auf groaße Massn vo Leid. Des mog am brauna Moorwassa liagn, des zwar gsund für d´Haut und am Körper sei soi, aber zwecks da dunklen Farb ned jeden gfoid. Dafür werd da Sä wega seina gringn Diafm recht schnei warm. Durch´s Biotop aus da Gletschazeit schlängeln si neba de Badegäst aber a Blindschleichan, Ringlnattan und Kreizottan. Wachsame Spaziergänger hom vielleicht sogor scho a heimische Wassaschuidgrötn gseng.

Am Nordufa is as „Woidhaus Deininger Weiha“, a Wirtschaft mid Biergartn und Fremdnzimma, des unsa Ausgangs- und Zuipunkt für den gmiatlichen Spaziergang uman Weiha is. Da Rundweg geht durch´n Woid los, vorbei an kloane Ufawiesn. Am Südufa gabat´s de Meglichkeit, an Weiha an da ersten Abzweigung glei zu umrundn oder an da zwoatn Gabelung an Spazierweg durch´s Deininga Fuiz auszudehna. Do geht da Weg ins Naturschutzgebiet, auf an guadn Weg mittig durchs Moor. Die schmoijn Liegewiesn links und rechts vom Woidhaus lodn im Somma auf a Bod an See ei, de Moorschlamm-Packung is praktisch dabei. De gmiatliche Rundwanderung is kindafreindle und a Kinderwong-daugle.